Feliciano Sante Jr.: Award-Winning Educator Ug Iyang Adbokasiya Para sa Inclusive Education sa Mga Batang Adunay Autism o Special Needs

Overtime Show

Si Feliciano Irediano Sante Jr., mas nailhan nga Sir Cian, usa ka award-winning Special Education (SPED) teacher gikan sa Malaybalay, Bukidnon, nagpaambit sa iyang kahibalo bahin sa autism ug ang iyang adbokasiya para sa inclusive education. Isip usa ka tigpanudlo nga adunay dugay nang kasinatian sa pag-atiman sa mga batang adunay special needs, gusto niyang masabtan sa tanan ang mga senyales sa autism ug ang importansiya sa paghatag og patas nga edukasyon alang sa mga bata.

Mga Senyales sa Autism Matod ni Sir Cian

Matod ni Sir Cian, kasagaran makita ang mga senyales sa autism sama sa kakulang sa eye contact, hyperactivity, kalisdanan sa pag-istorya, hand flapping, ug echolalia o ang pagbalik-balik sa nadunggan nga mga pulong. Ang mga batang adunay autism usahay maglisod sa pagsabot ug pag-apil sa mga tradisyonal nga classroom setting tungod sa ilang lain-laing pagkinaiya. Alang kang Sir Cian, importante nga masabtan kini nga mga senyales aron mahatagan dayon og tukmang atensyon ug suporta ang mga bata.

Adbokasiya Para sa Inclusive Education

Nagtuo si Sir Cian sa gahum sa inclusive education, diin ginahatagan og oportunidad ang tanan nga estudyante, special needs man o dili, nga mag-eskwela kauban sa ilang mga kaedad. Sa Malaybalay City Central School Special Education Center, diin nagtudlo si Sir Cian kauban ang 10 pa ka SPED teachers, ginadawat nila ang mga batang adunay special needs nga dili namili og klase sa kondisyon. Ginapaagi kini og espesyal nga assessment aron masiguro nga ang bata makadawat og tukmang pagtutok ug atensyon. Gani, daghan na nga mga bata ang naka-enroll ug naka-eskwela kauban sa regular nga mga estudyante sa normal nga klase. Para kaniya, ang inclusivity dili lang usa ka programa, apan usa ka pamaagi aron masiguro nga tanan maka-access sa edukasyon.

Dedikasyon Niya sa Serbisyo

Bisan pa nga daghan ang mga SPED teachers nga mas gipili nga manarbaho sa gawas para sa mas dako nga sweldo, si Sir Cian nagpabilin sa Pilipinas tungod kay nakita niya ang fulfillment sa kalamboan sa mga bata nga iyang ginaatiman. "Mas bililhon pa ang pagtan-aw sa ilang pag-uswag kaysa kadako sa sweldo," matod niya, nga nagsilbi isip inspirasyon sa iyang mga kauban ug sa komunidad.

Mga Pasidungog ug Nahimo ni Sir Cian

Si Sir Cian naggunit og Master of Arts in Teaching Special Education gikan sa Southwestern University ug usa ka Bachelor’s Degree in Elementary Education gikan sa Bukidnon State University. Karon usa siya ka Master Teacher I sa Malaybalay City Central School Special Education Center. Tungod sa iyang liderato ug dili matulisok nga dedikasyon, siya nakadawat og daghang pasidungog, lakip na ang 3rd Runner-Up alang sa Most Outstanding SPED Teacher sa National Search niadtong 2013 ug Most Outstanding Special Education Teacher sa Regional Search sa samang tuig. Ang mga pasidungog nagpamatuod sa iyang pagpaningkamot ug pagkakugi alang sa kaayuhan sa mga bata nga iyang ginaserbisyohan.

Pagbukas sa Kasingkasing ug Hunahuna para sa Inclusive Education

Para kang Sir Cian, ang inclusive education dili lang usa ka prinsipyo kundi usa ka misyon nga maghatag og mas maliwanag nga kaugmaon para sa mga batang adunay special needs. Bisan pa sa mga hagit ug kalisod, ang iyang dedikasyon nagpabilin nga mas lig-on aron masiguro nga walay bata ang mabayaan sa ilang edukasyon.

Ang paningkamot ug paglaum ni Sir Cian para sa inclusive education nagpabilin nga inspirasyon para sa tanan nga nagtinguha nga maghatag og maayong kaugmaon alang sa mga batang adunay special needs.